Արդարադատության նախարարության փոխանցմամբ՝ այսօր կայացել է Արդարադատության նախարարի հրամանով ստեղծված էլեկտրոնային արդարադատության համակարգի ստեղծմանն ուղղված միջոցառումները համատեղ կոորդինացնող միջգերատեսչական աշխատանքային խմբի անդրանիկ նիստը:
Նիստին ներկա են եղել Կենտրոնական բանկի, Բարձրագույն դատական խորհրդի, Գլխավոր դատախազության, Ոստիկանության, Նոտարական պալատի, Հարկադիր կատարումն ապահովող ծառայության, Քրեակատարողական և Պրոբացիայի ծառայությունների և այլ գերատեսչությունների ներկայացուցիչներ:
Նիստի ընթացքում Արդարադատության նախարարի պարտականությունները կատարող Գրիգոր Մինասյանն առաջարկել է քննարկել արդարադատության ոլորտի թվայնացման գործընթացում առաջ եկած խնդիրները:
Աշխատանքային խմբի անդամները բարձրաձայնել են իրենց և Արդարադատության նախարարության հետ համատեղ իրականացվող ծրագրերով առկա խնդիրները, մասնավորապես, անդրադարձ է կատարվել բանկային համակարգի հետ համագործակցությանը, իրավապահ համակարգի թվայնացման միջոցառումներին, դատարանների ծանրաբեռնվածության նվազեցման ուղղությամբ իրականացվող միջոցառումներին՝ այդ թվում՝ քաղաքացիական և վարչական դատավարությունների թվայնացման գործընթացներին:
Նիստի ընթացքում բարձրաձայնված հարցերի վերաբերյալ ձեռք են բերվել առավել արդյունավետ համագործակցությանն ուղղված պայմանավորվածություններ, ընդգծվել են առաջիկա անելիքները:
Հանդիպման ավարտին Գրիգոր Մինասյանը կարևորելով նման ձևաչափով հանդիպումները և ընդգծելով դրանց արդյունավետությունը՝ առաջարկել է առավել հաճախակի գումարել աշխատանքային խմբի նիստերը:
