Հայտարարության սույն տեքստը հաստատված է ՀՀ գլխավոր հարկադիր կատարողի 05.04.2024թ. № 300-Ա հրամանով հաստատված մրցութային հանձնաժողովի 26․11․2024թ. որոշմամբ:

Հարկադիր կատարումն ապահովող ծառայությունը (այսուհետ՝ Ծառայություն) հայտարարում է հարուցված կատարողական վարույթներով նախատեսված անշարժ գույքի չափագրման աշխատանքներ իրականացնելու համար լիցենզավորված մասնագետ ներգրավելու մրցույթ։

Մրցույթին մասնակցելու հայտ կարող է ներկայացնել ցանկացած իրավաբանական և ֆիզիկական անձ, որն ունի նշված աշխատանքներն իրականացնելու որակավորում (Կադաստրի կոմիտեի կայքում հրապարակված ցանկում ընդգրկված մասնագետներ):

Հայտերը պետք է ներառեն դիմում, անձի պետական գրանցման վկայականի պատճենը (ֆիզիկական անձի դեպքում՝ անձնագրի պատճենը), օրենքով սահմանված կարգով աշխատանքներ կատարելու իրավասություն (որակավորում), իր կողմից նախկինում կատարված աշխատանքների մասին տեղեկատվություն, Երևան քաղաքում և ՀՀ մարզերում աշխատանքներ իրականացնելու օպերատիվ կազմակերպման հնարավորության մասին հակիրճ տեղեկանք, աշխատանքների միավոր գինը՝ ներառյալ հարկերը, տուրքերը և պարտադիր վճարները:

Հայտը ներկայացվում է անձի կողմից սոսնձված և ստորագրված փակ ծրարով, որի դիմերեսին պետք է գրված լինի՝ «Չբացել մինչև հայտերի բացման օրը»:

Մրցույթի հայտերն անհրաժեշտ է ներկայացնել Մրցութային հանձնաժողովին’ Ծառայության Քաղաքացիների սպասարկման  բաժնի միջոցով  ք. Երևան, Հալաբյան 41ա հասցեով մինչև 26․12․2024թ. ժամը՝ 18:00֊ն։ Դրանք պետք է կազմված լինեն հայերեն:

Հայտերը կբացվեն 30․12․2024թ. ժամը՝ 12:00-ին: Մրցույթի մասնակիցները և նրանց ներկայացուցիչները կարող են ներկա գտնվել մրցույթի հայտերի բացման, ինչպես նաև մրցույթի հայտերի ամփոփման նիստերին:

Մրցույթի հաղթող կճանաչվի մրցույթի պայմաններին բավարարող և նվազագույն գնային առաջարկ ներկայացրած մասնակիցը:

Մրցույթում հաղթող ճանաչված մասնակցին կառաջարկվի մեկ տարի ժամկետով կնքել ծառայությունների մատուցման պայմանագիր: